it-s.okis.ru

Ma'naviyatli yoshlar - kelajak qanoti

2014 yilning 15-may  sanasida  o`zining tarovati bilan yer yuzining sayqali  deb  nom  olgan, qadimiyligi jihatidan  Rim   shahri  qatorida butun dunyoga  "abadiy shahar" nomi bilan   dong  taratgan azim Samarqand shahrida mutharam yurtboshimiz  I.A. Karimov boshchiligida "O`rta asrlar Sharq  allomalari va mutafakkirlarining tarixiy merosi uning zamonaviy sivilizatsiya rivojidagi roli va ahamiyati" mavzusidagi xalqaro ilmiy konferensiya bo`lib o`tdi. Ushbu anjumanning ochilish marosimida davlatimiz rahbari  Al-Xorazmiy,  Beruniy,  Ahmad  Farg`oniy,  Abu  Nasr  Forobiy,  Mirzo Ulug`bek, Ibn  Sino  va boshqa ko`plab sharq  allomalari,  mutafakkirlari ularning jahon tamadduni uchun dastur-ul amal bo`lgan ilmiy izlanishlari,  misli ko`rilmagan kashfiyotlari to`g`risida nutq so`zladi. Xususan,   prezidentimiz Ahmad Farg`oniy va uning yaratgan asarlari,  qilgan ishlari  to`g`risida,  shuningdek,  astronomik asbob -  usturlob nazariyasini ishlab  chiqqani,  Nil  daryosida  "nilomer"  degan ko`p asrlar davomida suv sathini  o`lchaydigan asosiy vosita sifatida xizmat  qilib kelgan mashhur inshootni yaratgani  haqida so`zlaganda  o`zining fikrlarini  quyidagicha bayon etdi:  "Men  

O`zbekiston Respublikasi Prezidenti sifatida Misr  Arab  Respublikasi poytaxti  Qohira shahrida bo`lganimda,  ana shu nilomerni ko`rib bu ulug`  ajdodimizning ilmiy dahosi oldida yana bir bor hayratga   tushish baxtiga muyassar bo`ldim". Yurtboshimizning bu kabi so`zlarini tinglar ekanman,  men  yana bir bor Sharq  tamadduni jahon sivilizatsiyasiga, Markaziy Osiyoda IX-XII va XIV-XV  asrlarda shiddatli dengiz to`lqinidek  ko`tarilgan renessans Yevropa renessansi uchun asos bo`lganiga amin bo`ldim.

         Bugungi kunda mamlakatimizda ana shunday buyuk ajdodlarimizga  har tomonlama munosib bo`lgan avlodni kamol toptirish uchun yoshlarga,  ta'lim sohasiga katta e'tibor  qaratilmoqda.  Yuksak ma'naviyatli, dunyoda bo`layotgan  o`zgarishlarga  o`z  munosabatini bildira oladigan,  mustaqil fikrga ega bo`lgan yoshlar  qatlamini shakllantirish uchun Yevropa standartlariga tenglasha oladigan zamonaviy shart-sharoitlar yaratilgan.  Yurtimizda  12 yillik umumiy majburiy bepul ta'lim tizimining joriy etilgani,  dunyoning bir  qator yetakchi oliy   o`quv yurtlarining filiallari,  xususan,  Italiyaning  Turin  Politexnika universiteti,  Malayziyaning Singapur Menejmentni rivojlantirish instituti,  Buyuk Britaniyaning Vestminster universiteti,  Moskva davlat universiteti va yana boshqa bir  qancha

universitet  filiallarining faoliyat  ko`rsatayotgani,  bundan  tashqari minglab itiqdorli  yoshlarimizning Germaniya,  Yaponiya,  AQSh,  Koreya,  Xitoy,  Fransiya, Buyuk Britaniya kabi  dunyoning yetakchi mamlakatlari universitetlarida  tahsil olayotgani yuqoridagi gapimizning  yorqin  dalilidir.

         Albatta,  bu kabi ulkan ishlar  o`z-o`zidan bo`lmaydi.  Bunday ishlarni amalga oshirish uchun  har yili davlat byudjetidan ma'lum miqdorda mablag`  ajratiladi.  Davlatimiz rahbarining ma'ruzasini tinglab shuni angladimki,  bugungi kunda  BMT ma'lumotlariga  ko`ra mamlakatimizda ta'limga yo`naltirilayotgan xarajatlar  davlat  byudjetining  35%  dan  ortig`ini tashkil etar ekan.  Boshqacha aytganda  O`zbekiston  davlati  byudjetidan  har yili  35%  mablag`  aynan ta'lim-tarbiya soahsiga yno`altiriladi.  Mantiqan  o`ylab  qaralsa,  bu xarajatlar anchayin yuqori raqamlar bilan ifodalanadi.  Lekin bularning barchasi  biz  yoshlar uchun,  bizning yuqori sifatlarda ta'lim olishimiz uchun amalga oshirilmoqda.  Shuningdek,  davlatimiz rahbari  O`zbekiston ta'lim tizimini rivojlantirish darajasi,  jumladan,  ta'lim  maqsadlari  uchun  ajratiladigan  mablag`lar  bo`yicha  dunyoda 

5-o`rinni egallaganligini alohida ta'kidlab  o`tdi.  Bu  so`zlar ayni  haqiqat. Chunki  12 yillik ta'lim tizimiga  o`tish munosabati bilan mamlakatimizda muhtasham kollej, litsey binolari  qurilishi uchun ajratilgan mablag`lar,  shuningdek,  birgina  "Janub  gavhari"  deya e'tirof etilgan Surxon vohasidagi yagona oliy  o`quv yurti  hisoblangan Termiz davlat universitetining  qaytadan bunyod etilishi uchun  62  milliard  so`m ajratilgani,  bundan tashqari viloyatda bolalar musiqa va san'at maktabining ishga tushirilishi,  jahon standartlariga mos keladigan yangi  ARM ning  qurilishi buning isbotidir.  Yoshlarga dunyo tillarini,  jumladan,  ingliz tilini  o`rgatishni kuchaytirish maqsadida  2012  yilning  10-dekabrida  "Chet  tillarni  o`qitishni  takomillashtirish to`g`risidagi" prezident  qarorining  qabul  qilinishi  ham    ta'lim sohasida yoshlarga  qaratilayotgan e'tiborning yana bir yorqin namunasidir. 

         Anjumanda davlatimiz rahbari  "Erishilgan bilimlarni  o`tmishda,  jumladan,  o`rta asrlar Sharqida amalga oshirilgan olamshumul kashfiyotlarni chuqur  o`zlashtirmasdan turib,  na ilm-fanda,  na boshqa sohalarda yangi,  yanada yuksak marralarni  zabt  etib  bo`lmaydi"  deya ta'kidlab  o`tdi.  Darhaqiqat,  bugungi kunda  biz  yoshlar yangidan  yangi  ilm  cho`qqilarini zabt etishimiz uchun buyuk ajdodlarimiz  asarlarini,  ularning  qilgan kashfiyotlarini  o`rganib,  ularni  o`zimiz uchun dastur-ul amal  qilib olmog`imiz lozim.  Bu  esa kelajakda mustaqil O`zbekistonimizda bo`lajak Beruniy,  Mirzo Ulug`bek,  Alisher Navoiy,  Forobiy,  Mahmud Zamaxshariy,  Mahmud Koshg`ariy kabi ilm ahllarining yetishib chiqishiga  zamin  hozirlaydi. 

         Yig`ilish so`nggida  yurtboshimiz biz  yoshlarga  har safar murojaat etganida hamisha alohida e'tirof etib: "Biz  buyuk ajdodlarimiz bilan faxrlanishimiz,  g`ururlanishimiz kerak.  Ayni vaqtda faqat  g`ururlanishning  o`zi yetarli emas,  kelinglar,  o`zimiz   ham,  xuddi ular kabi mana  shu bebaho merosga  o`z  hissamizni  qo`shaylik" degan so`zlarini yana  bir bor ta'kidlab  o`tdilar.

         So`zim so`nggida shu yurtning farzandi sifatida tengdoshlarimga,   yurtimizdagi barcha yoshlarga surxon yoshlari nomidan shunday murojaat  qilmoqchiman:  biz  ertangi kelajagimizning egalari  ekanmiz,  keling,  buni teranroq  mushohada  etib,  yuqoridagi gaplardan tegishli xulosa chiqarib,   biz  yoshlar uchun yaratilayotgan shart-sharoitlardan unumli foydalangan  holda vatanimiz  ravnaqi uchun  munosib  hissa  qo`shadigan,  yurt  xizmati  uchun

"labbay"  deya javob beradigan  yetuk kadr bo`laylik.  Bugungi kunda Buyuk Britaniya, Germaniya,  Rossiya, Misr kabi ko`plab mamlakatlar  kutubxonalarining "oltin  fondi"ni  tashkil etgan Sharq mutafakkirlari,  allomalarining yurtboshimiz aytib o`tganidek  o`z tadqiqotchisini kutayotgan buyuk kashfiyotlardan iborat ilmiy merosini chuqurroq o`rganaylik.  Zero,  vatanimizning ertangi taraqqiyoti,  farovon  turmushi,  jahon  hamjamiyatidagi  o`rni  biz  yoshlar  qo`lida.